மன்னிக்கத் தெரிந்த மனிதனின்மனது கவலைகளைச் சுமப்பதில்லை.

♥மன்னிக்கத் தெரிந்த மனிதனின்
மனது கவலைகளைச் சுமப்பதில்லை.

♥தண்டிக்கத் துடிக்கும் மனிதனின்
மனது நிம்மதியை உணர்வதில்லை.

♥குறை கூறித் திரியும் மனிதனின்
மனது நிறைகளைக் காண்பதில்லை.

♥நிறை தேடி புகழும் மனிதனின்
மனது மகிழ்வினை மறப்பதில்லை.

♥மகிழ்வூட்ட நினைக்கும் மனிதனின்
மனது இன்பத்தை இழப்பதில்லை.

♥புறம் பேசி அலையும் மனிதனின்
மனது இருளினைக் களைவதில்லை.

♥துன்பத்தைப் பொறுத்த மனிதனின்
மனது துயரினில் மடிவதில்லை.

♥இன்பத்தை வேண்டும் மனிதனின்
மனது சந்தோஷத்தில் திளைப்பதில்லை.

♥சந்தேகம் நிறைந்த மனிதனின்
மனது சந்தோஷத்தைச் சுவைப்பதில்லை.

♥சஞ்சலம் அற்ற மனிதனின்
மனது சங்கடத்தைச் சந்திப்பதில்லை.

♥ஆசையை அடக்கும் மனிதனின்
மனது மோசம் போவதில்லை.

♥நேசம் கொண்ட மனிதனின்
மனது பாசத்தைத் துறப்பதில்லை.

♥உதவிட நாடும் மனிதனின்
மனது சிரிப்பினை தொலைத்ததில்லை.

♥கொடுத்திட நினைக்கும் மனிதனின்
மனது கெடுதியில் வீழ்வதில்லை....

♥துஷ்டத்தை நாடும் மனிதனின்
மனது கஷ்டத்தைக் களைவதில்லை....

♥ஆறுதல் சொல்லும் மனிதனின் மனது அவதியில் அழுவதில்லை....

♥பெருமையைத் தவிர்த்த மனிதனின்
மனது சிறுமையில் வீழ்வதில்லை....

♥பொறுமையாய் இருக்கும் மனிதனின்
மனது வெறுமையைக் காண்பதில்லை....

♥இலட்சியம் கொண்ட  மனிதனின் விழிகள் இமைகளை மூடுவதில்லை
பொழுதினைப் பாழ்படுத்தும்மனிதன்
என்றும் உருப்படுவதில்லை.....

♥சிந்திக்கத் தவறிய மனிதனின்
மனது அமைதியில் நிலைத்ததில்லை.....

♥நல்லெண்ணம் கொண்ட மனிதனின்
மனது மரணித்து விடுவதில்லை.....

♥இறையச்சம் உள்ள மனிதனின்
மனது பிற அச்சம் கொள்வதில்லை....

♥இதை உணர்ந்து கொண்ட மனிதனின்
மனது என்றும் அழிவதில்லை !

♥ அன்பழகி கஜேந்திரா _ இலங்கை _மன்னார்.