ஒரு நிமிடக் கதை: அவரவர் கவலை!

♥ஒரு நிமிடக் கதை: அவரவர் கவலை!

♥''கலா.. கிளம்பறேன்" என தன் மனைவியிடம் கூறிவிட்டு கிளம்பினான் ராஜா.
"என்னங்க.. இன்னைக்காவது ஸ்கேன் எடுக்கணும்னு டாக்டர் சொல்லியிருக்கார்."

♥கர்ப்பிணியான மனைவிக்கு என்ன பதில் சொல்வது என்று தெரியாமல், "கண்டிப்பா முதலாளிக்கிட்ட அட்வான்ஸ் கேட்கிறேன் கலா" என்று சொல்லிவிட்டு கிளம்பினான்.
இரண்டு அடி எடுத்து வைத்தவன், திரும்பி தயங்கியபடி "கலா.. ஒரு நூறு ரூபாய் இருந்தால் கொடேன். செலவுக்கு கையில் பணமே இல்லை" என்றான்.

♥தனக்கு மாத்திரை வாங்க வைத்திருந்த பணத்தை கணவனிடம் கொடுத்தாள் கலா.
ஒரு பெரிய நிறுவனத்தின் முதலாளிக்கு கார் டிரைவர் உத்யோகம் ராஜாவுக்கு.

♥முதலாளியைக் காண வெளிநாட்டு நண்பர்கள் வந்ததால் அவர்களை சில இடங்களுக்கு காரில் அழைத்துச் சென்றார் முதலாளி. மதியம் முதலாளியும் அவரது நண்பர்களும் நட்சத்திர ஹோட்டலில் சாப்பிட்டுவிட்டார்கள். ராஜாவுக்கு பசித்தது. ஆனால், அருகில் எதுவும் சாதாரண ஹோட்டல் இல்லை. சற்று தூரம் போய் சாப்பிட்டுவிட்டு வரலாம் என்றால், எப்போது வேண்டுமானாலும் முதலாளி கூப்பிடுவார். எனவே, பிற்பாடு சாப்பிட்டுக் கொள்ளலாம் என ராஜா காத்திருந்தான்.

♥போன வேலை முடிந்து, அனைவரும் காரில் திரும்பும்போது மாலை ஆகிவிட்டது.
முதலாளி வண்டியை நிறுத்தி சிகரெட் வாங்கி வரச்சொல்லி ராஜாவிடம் சொன்னார். முதலாளி பர்ஸில் சில்லறையாக இல்லை.
"சில்லறை இல்லை ராஜா.. நீயே வாங்கிட்டு வா"ராஜாவிடம் காலையில் அவன் மனைவியிடம் வாங்கிய நூறு  ரூபாய் மட்டுமே. அதைக் கொடுத்து சிகரெட் வாங்கி வந்து கொடுக்க, முதலாளி தன் நண்பர்களுடன் புகைத்தபடி பேசிக் கொண்டிருக்க, ராஜா பசியோடு காத்திருந்தான்.

♥'இன்னிக்கு முதலாளிகிட்ட கேட்டு அட்வான்ஸ் வாங்கிட்டா, நாளைக்கே கூட ஸ்கேன் பண்ண கூட்டிட்டு போயிடலாம்' என்று மனதிற்குள் திட்டம் போட்டுக் கொண்டிருந்தான் ராஜா.
"ராஜா.. காரை எடு.." முதலாளியும் நண்பர்களும் வந்து காரில் உட்கார, கார் கிளம்பியது.

♥நண்பர்களை அவர்கள் இருந்த நட்சத்திர ஹோட்டலில் விட்டுவிட்டு, முதலாளியின் வீட்டுக்கு அவர்கள் திரும்பும்போது இரவாகிவிட்டது. முதலாளி களைத்துப் போயிருந்தார். ராஜாவும் தான்.
"நாளைக்கு காலைல பத்து மணிக்கு வந்துடுப்பா" என்று சொல்லிவிட்டு முதலாளி உள்ளே போக, ராஜா தயங்கி தயங்கி " சார்.. வந்து"

♥"என்னப்பா.. சொல்லு". அந்த ‘சொல்லு’-வில் ஏகப்பட்ட சலிப்பு தெரிந்தது.
"இல்ல.. சம்பளத்துல அட்வான்ஸ் பணமா ஒரு ரெண்டாயிரம் ரூபா குடுத்தீங்கன்னா..' வாக்கியத்தை முடிக்கும் முன் முதலாளி முறைத்தார்.

♥"எப்ப பாத்தாலும் இதே தொல்லையாப்போச்சு.. பணம் எல்லாம் இல்லை.. நாளைக்கு காலைல நேரத்துக்கு வந்துடு.. நிலைமை புரியாம. அட்வான்ஸாம்.. ஃபிரெண்ட்ஸ்கிட்ட  நான் கேட்டிருக்க 1 கோடி ரூபா கடன் நாளைக்காவது கிடைக்குமான்னு தெரியாம குழம்பிட்டிருக்கேன்.. இவன் வேற.." என்று சலித்துக் கொண்டே உள்ளே போனார் முதலாளி.

♥கையில் இருந்த நூறு ரூபாயும் முதலாளிக்கு சிகரெட் வாங்க செலவழிந்துவிட்டதால் பாக்கெட்டும், வயிறும் காலி.
பசித்தது. வீட்டுக்குப் போய் கலாவிடம் என்னவென்று சொல்வது என்ற மன உளைச்சலுடன் நடக்க ஆரம்பித்தான் ராஜா.